Gamla bedehuset

Det første bedehuset i Fitjar vart vigsla i 1915 og var i bruk til 1982. Bedehuset stod på ei bygsla tomt på Tongane (Rimbareid). Det var eit enkelt bedehus. I hovudetasjen var det inngang og møtesal med eit mindre bønerom på sida, som ein kunne opna til hvoudsalen. Over gangen og bønerommet var det galleri. Under huset var det steinkjellar, og her var det kjøken og eit rom med plass til nokre langbord. I dei nesten 70 åra huset var i bruk var det eit rikt arbeid der med møter, møteaksjonar, basar, foreiningsmøter mm. Siste møte på «gamla-bedehuset» vart halda søndag 18. april 1982. (Kjelde Kyrkjeboka «Så fast ei borg»)

Nye Fitjar bedehus

I starten av 1960-åra snakka folk om at det gamle bedehuset på Rimbareid, som var bygd tidleg på 1900-talet, hadde gjort fullgod tenesta, og at det var trong for fornying. 5.februar 1962 vart den første plannemnda for eit nytt bedehus vald. Sokneprest Einar Tuvin var formann i nemnda. Den første bedehusforeininga vart starta 27. februar 1964, og det skulle visa seg å vera på dagen 17 år før ein la ned grunnsteinen til det nye bedehuset i sentrum. 29. mars 1968 vart det vald ny plannemnd, no med den nye soknepresten Finn Hadde Tvedt som formann. Nokre år seindare, 23. mars 1973, vart det vald ei eiga innsamlingsnemnd med Lars K Vik som leiar, og ei ny plannemnd med Georg Vik som formann. 8. desember 1976 mottok ein godkjennin frå Fitjar jordstyre, og 9. mars 1977 fekk ein godkjenning av Hordaland fylkeslandbruksstyre. Tomtespørsmålet var no i orden og det vart vald eit eige styre for det nye bedehuset som skulle byggjast. Formann for styret vart Eli Vestbøstad (2 år) og seinare Georg Vik. Det vart og vald ei byggjenemnd. I byggjenemnda var Trygve Eiken formann, og nemnda engasjert arkitektane Anda og Hirth frå Voss til å teikna huset. Etter fleire år med skriving og søknadar att og fram, kom arbeidet i gong.

14. mai 1980 var fyrste spadestikk teke, og i frisk kuling 31. januar 1981 kom sperreflagget opp.27. februar 1981 var det grunnsteinsnedlegging.
Kommune ville leiga ein del av kjellaretasjen til helsestasjon med helsesyster og lege. Dugnadsgjengen prioriterte helsestasjonen, og den kunne flytta inn allereie i juli 1981. Arbeidet med første høgda og loftet gjekk jamt og trutt vidare og fyrste bønemøte på det nye bedehuset vart halde onsdag 19. august 1981. Mange dugnadsarbeidarar var i sving og kvar laurdag vart det servert mykje god mat til dugnadfolket. Tysdag 24. november 1981 var det verste veret i manns minne med orkan frå nordvest. «Me tek lommelykt med på stillaset i kveld i tilfelle straumen går» , var beskjeden til dungadsgjengen.

Søndag 18. april 1982 var det for siste gong møte på bedehuset på Rimbareid, og fem dagar seinare (23.04.82) vart det halde årsmøte for det nye Fitjar bedehus i det halvferdige huset. Nils M Rydland hadde andakt på årsmøtet. Søndag 25. april 1982 vart det første møtet på det nye bedehuset halde. Dette var eit familiemøte med tale av sokneprest Tore Tangen. Det store oppmøtet på ca 200 personar vitna om at mange gjerne ville vera med å ta det nye forsamlingslokalet i bruk.

17. mai 1982 var det 17. mai-fest på bedehuset med tale av Inge Ree.

Søndag 17. oktober, 10 ½ år etter at planarbeidet starta, var det vigsling av det nye bedehuset (Fitjar bedehus). Dette var ein stor dag for kristenfolket i bygda, mange ville ta del i festen og det var heilt fullt på bedehuset. Det kom inn ca 50 000,- i kollekt denne dagen. Generalsekretær Ole Abel Sveen stod for sjølve vigslinga. Elles var det eit flott program med mykje takk til Gud for det fine og gode huset ein ho hadde fått. Ein god base for å bringa evangeliet om Jesus ut til bygdefolket.
(Kjelde Trygve Eiken)